போர்!

மீண்டும் சில புத்தகங்கள்…

ஒவ்வொரு புத்தகத்தை வாசிக்கையிலும், ஏதோ ஒரு அனுபவம் நமக்குக் கிடைக்கிறது. எல்லோருக்கும் கிடைக்கவில்லையென்று வாதம் இருப்பின், எனக்குக் கிடைக்கிறது எனக் கொள்க. பெரும்பாலும் வரலாற்று நாவல்கள் படிப்பதில் எனக்கு ஆர்வம் இருக்கும். என் பள்ளி ஆசிரியர்கள் யாரும் தூண்டியதாக எனக்கு இதுவரை நினைவில்லை. ஏதோ ஜீன் சம்பந்தப்பட்ட விடயமாகவும் இது இருக்கலாம். எப்படியோ, வரலாறு மேல் ஒரு ஈர்ப்பு.

நாவல் எழுதுகிறவர்கள் ஆங்காங்கே சலிப்பில்லாதபடி, வரலாற்று நிகழ்வுகளைத் தொட்டுக் காண்பிப்பார்கள். அந்த நூலைப் பிடித்து நாமும் கொஞ்சம் அறிய ஏதுவாக இருக்கும். மாறாக Non-Fiction வகை எழுத்துக்களில் அதிலும் வரலாற்று நூல்களை (குழப்பிட்டேனா? ) படிப்பதில் நாம் அதிகம் சலிப்படையக் கூட நேரலாம்.

அண்ணன் ஒருவர் சமீபத்தில் TET தேர்வு எழுதினார். அவருக்கு உதவும் வண்ணம் என்னையும் அவர் வீட்டுக்கே வரச் சொன்னார். போனேன். பள்ளிக்கல்வியில் சமச்சீராக மாற்றம் நடந்த பிறகு, நான் (கிட்டத்தட்ட) எல்லா புத்தகங்களையும் கண்டது அங்கேதான். நானெல்லாம் 1947++ வரைதான் வரலாறு படித்திருந்தேன். அதிலும் பெரும்பாலும் இந்திய வரலாறு.  இப்போது 10-ம் வகுப்பு படிக்கிறவர்களுக்கே, உலக வரலாறை அள்ளித் தெளித்திருக்கிறார்கள். இதில் என் கருத்தை அழுத்தமாகவே சொல்லிவிடுகிறேன். படிப்பதற்கு சற்றே கடினமான வரலாறு பகுதிதான் அது.  அதிலெப்படி ஆளாளுக்கு 100/100 வாங்க முடியும்? என்று யோசித்து, விசாரித்ததில், வினாத்தாள் அமைப்பு முறையில் பெரும் வித்தியாசம் இருப்பதாக அறிந்தேன். எப்படியோ? அது போகட்டும் கதை.

அங்கே அண்ணனுக்கு வரிவரியாகப் படித்து, பத்திபத்தியாக கதை சொல்லி வரலாறு பாடம் படித்தேன். முதல் மற்றும் இரண்டாம் உலகப் போர்கள் திடீரென நினைவு கிளறியது. அதில் உள்ள தகவல்கள் எல்லாமே பெரும்பாலும் எனக்குத் தெரிந்தவை. ஆனால் நடை சற்று கண்டிப்பாக இருந்தது. (பள்ளி மாணவர்களுக்கு கண்டிப்பாக இல்லாமல் என்ன? )

நான் சில ஆண்டுகளுக்கு முன்புதான், எழுத்தாளர் மருதன் எழுதிய இரண்டாம் உலகப் போர் நூலைப் படித்தேன். அந்நூலின் அட்டையும் கதை சொல்லும்! முதல் உலகப் போர் என்கிற நூலையும் அவரே எழுதியிருக்கிறார் என்பதை பின்னர் அறிந்தேன்.

பொதுவாக இந்தப் போர்களை எங்காவது எடுத்துக் காட்டினால், ஹிட்லரின் பெயரையும் சேர்த்து எழுதாமல் போனால், தெய்வக்குத்தம் ஆனாலும் ஆகிவிடும்! அந்தளவு நிறைய நூல்களில் ஹிட்லர்தான் நிற்கிறார். அதாகப்பட்ட ஹிட்லர், முதல் உலகப் போரில் கடைநிலை சிப்பாய்களில் ஒருவராக இருந்தார். அதே ஹிட்லர்தான், இரண்டாம் உலகப் போரின் நாயகன் (துவக்கப் புள்ளி என்றும் படிக்கலாம்!) என்று பல்வேறு நூல்களில் படித்த நினைவு. இதில் சில புத்தகங்களில் தமிழ்ப்படுத்துகிறேன் என நினைத்தோ, என்னமோ, முதல் மற்றும் இரண்டாம் நாடுபிடிச் சண்டைகள் என்று கூட எழுதியிருந்தார்கள். முதல் உலகப் போரில் அதிகம் அடிபட்டது ஜெர்மனி. பிராய்சித்தம் அடைய எண்ணி இரண்டாம் உலகப்போரில் இரண்டாகவே பிரிந்து விட்டது வேறு கதை. அதெல்லாம் விடுங்கள்….

எனக்கு மருதன் எழுத்தின் மேல் கொஞ்சம் ஈர்ப்பு உண்டு. வரலாற்று விடயங்களை  (நான் படிக்கையில் எனக்கு ) சலிப்பு ஏற்படுத்தாமல் எழுதியவர்களுள் இவர் முதன்மையானவர். அதற்கும் வரலாற்று ரீதியான காரணங்களை நான் தருவேன். ஆனால் அது இப்போது அல்ல.

”தரையைக் காட்டி இதோ நம் அதிபர் என்றார்”

“ஒப்பந்தமாவது புடலங்காயாவது என்று  போரில் குதித்தது……. ”

இப்படி நிறைய இடங்களில் அலுக்காமல்,  எழுத்துக்களைக் கொண்டே வரலாறு சொல்வார் அவர். சற்றே மலிவான முறை என்றாலும், மேற்படி அதிகம் அறிந்துகொள்ள அவரின் நூல்கள் என்னைத் தூண்டியிருக்கின்றன. வரலாறைப் படிக்க நினைப்பவர்கள் 6-10 வரை உள்ள சமச்சீர் கல்வி புத்தகங்களில் சமூக அறிவியல் பாடத்தை மட்டும் படிக்க முயற்சிக்கலாம். நல்ல பொழுதுபோக்கு!

ட்விட்டரில் ஒரு ட்வீட் படித்தேன். வைரமுத்து மூன்றாம் உலகப் போர் நாவலை விகடனில் துவக்கியபோது. அதை எழுதியது @sanakannan என்று நினைக்கிறேன்.

”மூன்றாம் உலகப் போர் எழுதுகிறார் வைரமுத்து. முதல் இரண்டு உலகப் போர்களையும் மருதன் எழுதிவிட்டதால் .” என்கிற பொருளில் எழுதியிருந்தார். சற்று வார்த்தைகள் மாறி இருக்கலாம். பொறுத்தருள்க.

நட்பில் இனிய தோழர் அர்ஜூன் அவர்கள் மூலமாக இரண்டாம் உலகப் போர் நூலைப் படித்தேன். அவரே ஆர்வங்கொண்டு தேடி, எனக்கு இப்புகைப்படங்களை அனுப்பினார்.  இரண்டாம் உலகப் போரில் பங்குகொண்ட போர் விமானங்களுள் சிலவற்றை மட்டும் இங்கே பகிர்ந்துள்ளேன்.

தோழருக்கு நன்றி.

This slideshow requires JavaScript.

Advertisements

மறுமொழியிட

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s